Іўе
Іўе - маленькі горад у Гродзенскай вобласці на захадзе Беларусі. Існуе паданне, якое апавядае аб заснаванні горада Евай - жонкай Вялікага князя Літоўскага Гедыміна. У пісьмовых крыніцах упершыню паселішча згадваецца ў 1444 годзе як вялікакняскі двор, падораны князем Казімірам IV Пятру Мантыгердавічу, які займаў пасаду надворнага літоўскага маршалка. Па адной з версій назва Іўе паходзіць ад фіна-вугорскага "йыв" - "выток ракі". У Іўі існавала арыянская друкарня. Тут дзейнічала арыянская школа, рэктарам якой у 1585—1593 гг. быў вядомы ў XVI стагоддзі педагог і мысляр Ян Ліцыній Намыслоўскі. У Іўі пражывае прыкладна 7 тысяч жыхароў.